Gjykata ka pushuar çështjen penale në ngarkim të ish-drejtorit të Përgjithshëm të Policisë së Shtetit, Muhamet Rrumbullaku, i cili po hetohej për veprën penale të shpërdorimit të detyrës.

Vendimi është marrë nga gjyqtari Erjon Çela, me kërkesë të prokurores së Prokurorisë së Posaçme (SPAK), Doloreza Musabelliu. Sipas SPAK, nga hetimet nuk u gjetën prova që të mbështesnin kryerjen e veprës penale për të cilën ishte depozituar kallëzimi penal ndaj Rrumbullakut.

Ish-kreu i Policisë së Shtetit ishte marrë në pyetje në nëntor të vitit të kaluar nga SPAK, për rreth një orë, në cilësinë e personit në dijeni. Hetimi lidhej me transferimet e disa punonjësve të policisë, çështje për të cilën ishin ngritur dyshime për shkelje ligjore.

Dosja kishte nisur fillimisht në Prokurorinë e Beratit, por më pas u transferua në SPAK për shkak të kompetencës. Hetimi kishte në fokus rreth 20 transferime në radhët e Policisë së Shtetit, të cilat disa palë i kishin konsideruar si të paligjshme.

Pas shqyrtimit të provave dhe veprimeve hetimore, Prokuroria e Posaçme arriti në përfundimin se nuk kishte elementë të mjaftueshëm për vijimin e procedimit penal, duke çuar kështu në pushimin përfundimtar të çështjes.