Komisioni për Çështjet e Brendshme dhe të Mbrojtjes po shqyrton sot projektligjin “Për importin, eksportin dhe transitin e armëve të zjarrit, të komponentëve të tyre kryesorë dhe të municioneve”, me pjesëmarrjen e ministrit të Mbrojtjes Pirro Vengu.

Gjatë diskutimeve, deputeti i Partisë së Lirisë, Tedi Blushi, lëshoi akuza të forta ndaj qeverisë dhe Ministrisë së Mbrojtjes, duke ngritur shqetësime për marrëveshje të dyshuara me kompani të huaja dhe për dhënien e pronave të ushtrisë. Blushi kërkoi sqarime konkrete mbi interesin e qeverisë për bashkëpunimin me kompaninë Elbit System, e cila sipas tij është pezulluar dhe nën hetim nga NATO.

Ai iu referua edhe denoncimeve të ish-zëvendëskryeministrit Arben Ahmetaj, duke theksuar se deri më tani nuk ka pasur transparencë publike për këto akuza. “Pronat e ushtrisë nuk janë as të ministrit dhe as të kryeministrit”, tha Blushi, duke kërkuar llogaridhënie për çdo marrëveshje që lidhet me sigurinë kombëtare.

Në fjalën e tij, deputeti i PL-së pyeti drejtpërdrejt nëse qeveria po i kalon prona të Forcave të Armatosura biznesmenit izraelit Ron Yeffet dhe nëse ky i fundit është i përfshirë në aktivitetet e importit dhe eksportit të armëve në Shqipëri.

Blushi ngriti gjithashtu shqetësime për situatën e përmbytjeve në disa qarqe, duke akuzuar Ministrinë e Mbrojtjes se ka lënë Forcat e Armatosura pa mjetet e nevojshme për përballimin e emergjencave, si dhe kërkoi sqarime mbi masat e marra aktualisht në terren.

Në fund, ai adresoi edhe çështjen e financimit të ushtrisë, duke pyetur se kur qeveria do të përmbushë plotësisht kriteret e kërkuara nga NATO për buxhetin e mbrojtjes.