Një mashtrim online po shënjestron qytetarët me oferta të rreme për kredi, me qëllim marrjen e parave nga të gjithë ata që bien në grackë. Policia e Shtetit njofton se persona të panjohur përdorin faqe të dyshimta, rrjete sociale dhe mesazhe elektronike për t’u prezantuar si përfaqësues të institucioneve financiare.

Autoritetet bëjnë thirrje për kujdes të shtuar dhe këshillojnë qytetarët që të mos ndajnë të dhëna personale apo bankare me persona të paidentifikuar. Policia rekomandon gjithashtu verifikimin e çdo informacioni dhe komunikimin direkt me faqet zyrtare të bankave përpara se të aplikojnë për kredi.

“Policia e Shtetit këshillon qytetarët të mos dërgojnë para, të dhëna bankare apo dokumente personale te persona të paidentifikuar apo faqe interneti të pasigurta. Përpara se të aplikojnë për kredi, të verifikojnë gjithmonë informacionin dhe të komunikojnë drejtpërdrejt me personelin bankar duke përdorur kontaktet zyrtare të publikuara në faqet e bankave përkatëse,” thuhet në njoftim.

Qytetarët ftohen që çdo rast të dyshimtë për mashtrim të denoncohet menjëherë pranë Policisë së Shtetit, me qëllim parandalimin dhe hetimin e këtyre veprave penale. Policia mbetet e angazhuar në luftën kundër krimit kibernetik dhe apelon për kujdes, verifikim dhe bashkëpunim nga ana e qytetarëve.