Kostandin Nishku, 59 vjeç, i shpallur në kërkim ndërkombëtar prej 29 vitesh, është arrestuar në Greqi dhe pritet të ekstradohet drejt Shqipërisë. Ai është dënuar me burgim të përjetshëm për vrasjen e një 9-vjeçari në Gramshi, nipi i një personi që kishte vrarë vëllain e Nishkut. Nishku ka arritur t’i shpëtojë drejtësisë që nga viti 1997, duke jetuar me identitet të rremë si Hariz Vjeri.
Policia e Shtetit njoftoi se arrestimi është kryer me qëllim ekstradimin e tij dhe se identifikimi u mundësua përmes teknologjisë moderne të njohjes së fytyrës “Facial Recognition”, duke krahasuar fotografinë e tij të vitit 1997 me pasaportën e rreme të marrë në vitin 2013.
Historia tragjike e ngjarjes nis më 19 mars 1997. Nishku, së bashku me Roland Kotorrin, kanë shkuar të armatosur në shtëpinë e Kujtim Bregut për të gjetur vëllain e tij, Veli Bregun, i cili kishte vrarë vëllain e Nishkut në vitin 1993 dhe ishte arratisur gjatë trazirave të vitit 1997. Veli Bregu nuk ndodhej në banesë, por aty ishin Kujtimi, gruaja dhe dy fëmijët e tij, 10 dhe 15 vjeç.
Pas refuzimit të familjarëve për të treguar vendndodhjen e Veli Bregut, Nishku ka qëlluar me armë djalin 9-vjeçar në kokë, duke i shkaktuar vdekjen e menjëhershme. Pas ngjarjes, Nishku është larguar drejt Greqisë dhe ka jetuar me identitet të rremë për më shumë se dy dekada.
Autoritetet shqiptare dhe INTERPOL-i po finalizojnë procedurat për ekstradimin e Nishkut, i cili pritet të vuajë dënimin me burgim të përjetshëm në Shqipëri.
