Numri i lartë i të paraburgosurve në Shqipëri ka shqetësuar Këshillin e Europës, duke nxitur vlerësime kritike për përdorimin e masës së paraburgimit. Kryeministri Edi Rama ka ndarë dje deklaratën e drejtorit të Përgjithshëm për të Drejtat e Njeriut dhe Sundimin e Ligjit, Gianluca Esposito, i cili vizitoi Tiranën ditën e enjte.

Sipas Esposito, paraburgimi duhet të përdoret vetëm kur ka tregues të qartë për raste të caktuara dhe nuk duhet të tejkalojë një afat të arsyeshëm. Ai nënvizon se Gjykata për të Drejtat e Njeriut rekomandon masa më pak dëmtuese sesa paraburgimi kur është e mundur, duke shmangur mbipopullimin e burgjeve.

“Arresti me burg pa gjyq si praktikë normale ka sjellë rezultatin skandaloz të një vendi europian me më shumë të paraburgosur se sa të burgosur, duke alarmuar Këshillin e Europës,” shkruan Rama.

Esposito shton se autoritetet gjyqësore kombëtare duhet të sigurojnë që barra e provës të mos përmbyset duke detyruar personin e ndaluar të tregojë arsyet për lirimin e tij. Problemi kryesor mbetet përdorimi i tepruar dhe i paarsyetuar i paraburgimit, veçanërisht në gjykatat e shkallës së parë dhe gjatë rishikimeve periodike.