Mbi 10 mijë persona pritet të përfitojnë nga amnistia e ardhshme penale në Shqipëri, sipas shifrave paraprake të Ministrisë së Drejtësisë. Nga ta, mbi 7,700 kanë procedime për drejtim të parregullt të automjeteve, ndërsa rreth 1,300 janë të dënuar. Nga të dënuarit, 380 do të lirohen ndërsa 900 të tjerë do të përfitojnë ulje dënimi.

Detajet u bëjnë të ditura nga ministri i Drejtësisë, Besfort Lamallari, gjatë një konference për mediat. Ai theksoi se amnistia synon të lehtësojë përdorimin e tepruar të paraburgimit për veprat e lehta dhe të japë një mundësi të dytë për personat që bien pre e zbatimit represiv të ligjit.

“Amnistia penale është dërguar në Këshillin e Ministrave dhe presim miratimin në mbledhjen e qeverisë dhe depozitimin në Kuvend. Kategoria që përfiton është shumë e madhe, duke përfshirë edhe procedimet e vitit 2024. Përfituesit përfshijnë gra dhe të mitur, duke treguar se jemi një shoqëri që duhet të orientohet drejt parandalimit dhe rehabilitimit,” tha ministri.

Ai sqaroi se nuk përfitojnë persona në hetim ose gjykim nga SPAK dhe GJKKO, duke theksuar se amnistia nuk synon të prekë raste me prioritet për drejtësinë e re. Zbatimi i saj do të varet nga miratimi në qeveri, Komisionet parlamentare dhe vota përfundimtare në Kuvend.

Amnistia vjen në një kohë kur mbi 50% e të burgosurve janë në paraburgim, një problem që ka tërhequr kritika të Komitetit Kundër Torturës në raportet e viteve 2019 dhe 2023. Ministria e Drejtësisë ka nisur analizën e veprave që mund të përjashtohen nga paraburgimi, duke marrë parasysh rrezikshmërinë dhe afatet e dënimit.