Ulsi Manja ka prezantuar një nismë për ndryshime në Kodin e Procedurës Penale, e cila synon zgjerimin e listës së funksionarëve të lartë ndaj të cilëve nuk mund të aplikohet masa e pezullimit nga detyra me vendim gjykate.
Propozimi parashikon ndërhyrje në nenin 242 të Kodit, duke shtuar edhe shtatë kategori të reja zyrtarësh në listën ekzistuese. Aktualisht, nga kjo masë përjashtohen vetëm personat e zgjedhur sipas Kodit Zgjedhor: deputetët, kryetarët e bashkive dhe anëtarët e këshillave bashkiakë. Me ndryshimet e propozuara, lista zgjerohet për të përfshirë:
• Presidentin e Republikës
• Kryeministrin
• Zëvendëskryeministrin dhe ministrat
• Avokatin e Popullit
• Anëtarët e Gjykatës Kushtetuese
• Kryetarin e Kontrollit të Lartë të Shtetit
Në total, numri i subjekteve të përjashtuara nga masa e pezullimit nga detyra do të rritet nga tre në dhjetë.
“Nuk synojmë paprekshmëri, por balancë institucionale”
Gjatë prezantimit në grupin parlamentar të Partisë Socialiste, Manja theksoi se ndërhyrja ka natyrë procedurale dhe nuk zgjeron imunitetin kushtetues të zyrtarëve.
Sipas tij, ndryshimi synon garantimin e funksionimit normal dhe të pandërprerë të institucioneve që burojnë drejtpërdrejt nga Kushtetuta dhe që përbëjnë shtyllat kryesore të shtetit të së drejtës. Ai argumentoi se pezullimi nga detyra për këto funksione përbën një ndërhyrje të tërthortë të pushtetit gjyqësor në ushtrimin e kompetencave kushtetuese.
Manja bëri dallimin mes masave shtrënguese dhe masave ndaluese. Sipas tij, masat shtrënguese – si arresti në burg apo arresti në shtëpi – kufizojnë lirinë fizike dhe mbeten të paprekura nga ndryshimi i propozuar. Ndërsa masa e pezullimit nga detyra konsiderohet masë ndaluese me karakter funksional, që ndikon drejtpërdrejt në ushtrimin e një funksioni publik.
Referencë Kushtetutës dhe parimit të ndarjes së pushteteve
Propozuesit argumentojnë se drafti mbështetet në parimet kushtetuese, përfshirë ndarjen dhe balancimin e pushteteve, barazinë para ligjit dhe supremacinë e Kushtetutës në hierarkinë e normave.
Sipas Manjës, zyrtarët e përfshirë në ndryshim mbeten plotësisht të hetueshëm dhe të ndjekshëm penalisht. Prokuroria ruan kompetencën për të kryer hetime, ndërsa gjykata mund të vendosë masa të tjera sigurimi personal, përveç pezullimit nga detyra.
Projektligji pritet të shqyrtohet në Komisionin e Ligjeve përpara se të kalojë për votim në seancë plenare.
