Hagë – Në fjalën e tij para trupit gjykues në Dhomat e Specializuara në Hagë, Jakup Krasniqi deklaroi se qëndron përballë gjykatës jo si kriminel, siç përshkruhet në aktakuzë, por si një njeri i formuar në përpjekjet për dinjitet dhe liri.

“Qëndroj sot këtu para jush jo si një kriminel që përshkruan aktakuza e Prokurorisë, por si njeri i lindur dhe i kalitur në luftëra për dinjitet njerëzor nga një popull që refuzoi të zhdukej nga politikat e krimit dhe gjenocidit të Serbisë”, u shpreh ai.

Krasniqi e cilësoi të padrejtë dhe të panevojshëm burgimin e tij prej më shumë se pesë vitesh, duke shtuar se është i gatshëm të japë një rrëfim të plotë mbi luftën për pavarësinë e Kosovës.

“Pas më shumë se pesë vitesh burgim të padrejtë dhe, sipas mendimit tim, të panevojshëm, jam i angazhuar për të dhënë një rrëfim të vërtetë të luftës sonë për pavarësi kundër politikave të regjimit serb, që sollën vuajtje dhe shkatërrim të paparë për popullin e Kosovës”, deklaroi ai.

Sipas Krasniqit, pjesa më e madhe e jetës së tij është udhëhequr nga bindja se çdo qenie njerëzore meriton të jetojë në liri, ndërsa angazhimi i tij politik ka qenë i lidhur me përpjekjen për jetë dhe liri për popullin e Kosovës.

Procesi ndaj Krasniqit dhe ish-udhëheqësve të tjerë të UÇK-së vijon në Hagë, ndërsa trupi gjykues pritet të shqyrtojë argumentet e mbrojtjes dhe të prokurorisë përpara marrjes së një vendimi përfundimtar.