Octavian Şerban, ambasadori i Rumanisë në Shqipëri, e ka përshkruar Korridorin VIII si një element kyç për sigurinë rajonale, duke theksuar rëndësinë e tij për tranzitin e shpejtë të logjistikës mbrojtëse nga Deti i Zi në Adriatik dhe anasjelltas.

Në fjalën e tij gjatë Ministerialit për Korridorin VIII, që u mbajt të mërkurën në Tiranë, Şerban vuri theksin te përdorimi i dyfishtë i këtij korridori, duke lidhur aspektet e sigurisë dhe të ekonomisë.

“Mjedisi aktual i sigurisë kërkon kapacitete ushtarake që të përgjigjen me shpejtësi, në kohën dhe vendin e duhur. Sot reagimi i shpejtë është kriter për sigurinë e përbashkët. Lëvizshmëria ushtarake nënkupton aftësinë e lëvizjes së trupave dhe mjeteve në zonën tonë të përbashkët,” tha ambasadori.

Ai shtoi se Rumania është pjesë e projekteve të lëvizshmërisë ushtarake në korridoret e Juglindjes së Europës dhe se Korridori VIII luan rol kyç në koordinimin me aleatët nga Greqia, Bullgaria dhe Turqia.

“Këto korridore nuk janë të rëndësishme vetëm nga pikëpamja ushtarake, por edhe ekonomike. Rumania mbështet zhvillimin e kësaj infrastrukture kritike, që lehtëson lëvizjen ushtarake dhe lidh më mirë Detin e Zi me Adriatikun, duke konsoliduar sigurinë rajonale,” u shpreh Şerban.

Diplomati theksoi gjithashtu rëndësinë e lidhjes me korridore të tjera ushtarake dhe nevojën për rregullore të sigurta dhe të zbatueshme, duke nënvizuar bashkëpunimin me NATO-n, Bashkimin Europian dhe vendet e Ballkanit Perëndimor.

“Projektet me përdorim të dyfishtë janë me rëndësi për sigurinë rajonale dhe kërkojnë rregullore të qarta dhe të sigurta,” përfundoi ambasadori rumun.