Një aksident fatal është regjistruar në Austri, ku ka humbur jetën kushëriri 38-vjeçar i mesfushorit shqiptar të FC Zürich, Valon Berisha.

Sipas raportimeve, ngjarja ka ndodhur në autostradën Westautobahn, ku furgoni me të cilin udhëtonte viktima ka dalë nga rruga dhe është përplasur me një barrierë anësore.

Në momentin e aksidentit, Valon Berisha ndodhej në një automjet që lëvizte përpara furgonit dhe e ka parë ngjarjen përmes pasqyrës së pasme. Mesfushori është ndalur menjëherë për të dhënë ndihmën e parë, së bashku me disa kalimtarë të tjerë, deri në mbërritjen e shërbimeve të emergjencës.

Megjithatë, pavarësisht përpjekjeve për ta shpëtuar, 38-vjeçari është shpallur i vdekur në vendngjarje.

Në një reagim zyrtar, FC Zürich ka shprehur tronditjen për humbjen tragjike dhe ka sqaruar se lojtari nuk ishte i përfshirë drejtpërdrejt në aksident, por ishte dëshmitar i tij.