Një aksident fatal në kantierin e ndërtimit në Porzellangasse, zonë e Alsergrund në Vjenë, mori jetën e katër punëtorëve, tre prej të cilëve shqiptarë të Kosovës dhe një boshnjak. Ngjarja ndodhi gjatë shembjes së skelës, kur punëtorët mbetën të bllokuar nën rrënoja dhe beton ende të pangurtësuar, raporton Heute.

Ndihma ka arritur me vonesë, dhe të katër punëtorët nuk arritën të shpëtoheshin. Një punëtor tjetër, i dyshuar nga Maqedonia e Veriut, u plagos rëndë dhe ndodhet në trajtim në spitalin e Vjenës.

Një banor i zonës për Kronen Zeitung rrëfeu momentet dramatike pas aksidentit: “Ishte një zhurmë jashtëzakonisht e fortë, pastaj dëgjova vetëm britmat e punëtorëve. Më pas u ndezën sirenat.”

Zjarrfikësit përshkruan ndërhyrjen si jashtëzakonisht të vështirë. Oborri i ngushtë e komplikoi qasjen tek të bllokuarit, dhe për të arritur tek punëtorët u hoqën gardhe, dyer, pjesë të skelës dhe armatura hekuri. Largimi i betonit të lëngshëm u bë me dorë, ndërsa 120 forca zjarrfikësish dhe mbrojtjeje civile, me rreth 30 automjete, u angazhuan në operacion.

Për të nxjerrë të katër punëtorët, u përdorën edhe qentë kërkues. Dy orë e gjysmë pas fillimit të ndërhyrjes, katër viktimat u nxorën të vdekura.

Ambasada e Kosovës në Austri konfirmoi identitetin e tre viktimave shqiptare: Pajtim Barjami, Asllan Musli dhe Istref Zekaj. Në një reagim zyrtar, ambasada shprehu dhimbjen dhe ngushëllimet më të sinqerta për familjarët dhe të gjithë të prekurit nga kjo tragjedi, duke garantuar mbështetje të plotë dhe komunikim të vazhdueshëm me autoritetet austriake.