SPAK ka shpallur pretencën për 17 të pandehur të akuzuar si pjesë e një grupi të strukturuar kriminal, i cili dyshohet se merrej me kultivimin e kanabisit në sera të mbyllura në Berat.

Prokurori Behar Dibra ka kërkuar në total 133 vite burg, ndërsa dënimet më të rënda janë për Sadetin Hasajn dhe Blerim Xhekën, përkatësisht nga 13 vite secili.

Sipas organit të akuzës, nga aktiviteti kriminal janë përftuar rreth 1.7 deri në 1.8 ton kanabis sativa, ndërsa të pandehurit përballen me akuza të rënda si “Prodhimi dhe shitja e narkotikëve”, “Kultivimi i bimëve narkotike”, “Grup i strukturuar kriminal” dhe “Prodhimi dhe mbajtja e armëve dhe municionit”.

Dënimet e kërkuara nga SPAK:
• Sadetin Hasaj – 13 vite burg
• Blerim Xheka – 13 vite burg
• Sidrit Bisha – 10 vite burg
• Jurgen Ujkaj – 10 vite burg
• Samoel Lushaj – 10 vite burg
• Suad Smakaj – 9 vite burg
• Endriol Xheka – 9 vite burg
• Mirvaldo Disha – 9 vite burg
• Hamdi Dyli – 8 vite burg
• Arben Vrapi – 6 vite burg
• Adiol Çifkiku – 6 vite burg
• Lulzim Bushataj – 5 vite burg
• Mustafa Manej – 5 vite burg

Ndërkohë, për katër të pandehur – Bashkim Mema, Drita Mema, Izmire Mema dhe Edison Mema – është kërkuar pezullimi i dënimit me burg dhe vendosja në provë për një periudhë 3-vjeçare.

Operacioni dhe hetimet

Operacioni policor u zhvillua më 10 nëntor 2022, ku u sekuestruan rreth 870 kilogramë kanabis dhe u arrestuan të paktën 11 persona. Më pas, më 22 prill 2024, me kërkesë të SPAK, Gjykata e Posaçme vendosi masën “arrest në burg” për 9 persona.

Sipas hetimeve, aktiviteti kriminal zhvillohej në mënyrë të organizuar në sera të mbyllura në zonën e Beratit. Për këtë çështje, në atë periudhë u morën edhe masa disiplinore ndaj strukturave të policisë lokale, pasi aktiviteti nuk ishte zbuluar në kohë.

Çështja pritet të vijojë me fazën e vendimmarrjes nga gjykata, ndërsa kujtohet se çdo person konsiderohet i pafajshëm deri në një vendim të formës së prerë.