Aktorja e njohur turke, Hande Erçel, u kthye në Stamboll dhe u paraqit dje në Gjykatën e Çaglajanit, ku dha dëshminë e saj para prokurorit si pjesë e një hetimi për përdorim dhe lehtësim të përdorimit të lëndëve narkotike. Pas intervistës, ajo iu nënshtrua analizave toksikologjike në Shërbimin e Mjekësisë Ligjore (ATK), ku iu morën mostra gjaku dhe flokësh.

Hetimi, i drejtuar nga Zyra e Prokurorit Publik të Stambollit, përfshin gjithsej 16 të dyshuar, mes tyre emra të njohur si ish-presidenti i Beşiktaş, Fikret Orman, ish-presidenti i Galatasaray, Burak Elmas, biznesmenët Hakan dhe Kerim Sabancı, modelja Didem Soydan dhe moderatorja Güzide Duran.

Gjykata vendosi që disa të ndaluar të mbahen në paraburgim, ndërsa për disa të tjerë, përfshirë Tugce Ozbudak, u aplikuan masa kontrolli gjyqësor, duke përfshirë ndalim udhëtimi dhe arrest shtëpiak. Operacioni u zhvillua në 16 vende të Stambollit, duke rezultuar në ndalimin e 14 personave dhe lëshimin e urdhërave për dy të tjerë.

Hetimi vijon, ndërsa mediat turke theksojnë se ky rast ka përfshirë disa nga figurat më të njohura të sportit, televizionit dhe industrisë së modës në vend.