Seanca e së premtes në gjyqin për vrasjen e Lirdona Ademajt solli deklarata të forta nga i akuzuari Kushtrim Kokalla, i cili mohoi çdo rol në organizimin e krimit. Ai theksoi se takimet me të pandehurit e tjerë nuk kishin lidhje me vrasjen dhe se nuk kishte ndërmjetësuar mes tyre.

“Kontaktet dhe takimet me të pandehurit e tjerë nuk kanë pasur lidhje me veprën penale për të cilën ngarkohem”, deklaroi Kokalla, duke shtuar se ishte thirrur nga policia për intervistim në Gjakovë dhe kishte biseduar paraprakisht me hetuesit, të cilët e kishin akuzuar gabimisht si kryesor.

Ai shpjegoi se njohja me Granit Plavën ishte vetëm për shkak të një kredie prej 25 mijë eurosh që kishte marrë nga Naim Murseli, dhe se kontaktet me Plavën ishin pasojë e udhëzimeve të Murselit.

Prokuroria e kundërshton këtë version, duke pretenduar se Kokalla ka ndihmuar në gjetjen e Plavës, personi që më pas shkrep armën më 29 nëntor 2023, në këmbim të 30 mijë eurove.

Fjalët përfundimtare ndaj të akuzuarve pritet të jepen më 17 prill, duke i dhënë epilog një prej rasteve më të ndjekura kriminale në Kosovë.