Një 82-vjeçar është gjetur i pajetë në banesën e tij në Koufalia, disa ditë pasi në familje ishte raportuar një rast dhune që përfshinte bashkëshorten e tij 77-vjeçare.

Sipas informacioneve, policia u njoftua nga një fqinj rreth orës 19:00 dhe, sapo mbërriti në vendngjarje, e gjeti të moshuarin pa shenja jete. Në banesë ndodhej edhe bashkëshortja e tij, e cila ishte arrestuar më herët për një incident të ngjashëm dhune.

Burime bëjnë me dije se viktima kishte lëndime të jashtme, ndërsa autoritetet nuk përjashtojnë mundësinë e një ngjarjeje kriminale. Pritet që ekspertiza mjeko-ligjore të përcaktojë shkakun e saktë të vdekjes.

Sipas raportimeve të Protothema, konfliktet mes çiftit kishin nisur prej javësh. Edhe pse pas një përplasjeje të parë duket se ishte arritur një pajtim i përkohshëm, situata u përshkallëzua sërish.

Para ngjarjes tragjike, 77-vjeçarja kishte deklaruar: “Dua të shkojmë mirë, nuk dua të zihemi. Ai ka një të dashur dhe mund të më nxjerrë nga shtëpia.”

Hetimet vijojnë për të zbardhur plotësisht rrethanat e kësaj ngjarjeje të rëndë.