Korçë – Një konflikt mes dy grupeve të të rinjve ka përfunduar me plagosjen e një të mituri, ngjarje që ka ndodhur në lagjen nr. 2 të qytetit, pranë zonës së kinemasë.

Sipas informacioneve nga policia, i plagosuri është një 17-vjeçar me inicialet E.B., i cili ka marrë dëmtime me mjet prerës gjatë përplasjes dhe po trajtohet në spital jashtë rrezikut për jetën.

Uniformat blu kanë shoqëruar një person të dyshuar për përfshirje në ngjarje, ndërsa grupi hetimor po vijon punën për identifikimin e plotë të të gjithë personave të përfshirë.

Fillimisht u raportua se dëmtimi mund të ishte shkaktuar nga një rrëzim gjatë përleshjes, por hetimet paraprake kanë ngritur dyshime se i mituri është goditur me mjet prerës.

Në vendngjarje janë konstatuar edhe sende të forta të përdorura gjatë konfliktit, përfshirë një atlete që dyshohet se i përket njërit prej të përfshirëve.

Shkaqet e konfliktit mbeten ende të paqarta, ndërsa hetimet vijojnë për zbardhjen e plotë të rrethanave.