Në Samitin e Diasporës që po zhvillohet në Tiranë është shënuar një debat i fortë mes një minatori nga Bulqiza në emigrim dhe kreut të grupit parlamentar të PS-së, Taulant Balla.

Shkak i përplasjes u bënë çështjet e pronësisë mbi tokën dhe ligji 7501, si dhe mungesa e statusit të minatorit, për të cilin emigranti tha se është premtuar prej vitesh, por ende nuk është miratuar.

Gjatë fjalës së tij, minatori e cilësoi ligjin 7501 si “ligj kriminal”, duke pretenduar se ka krijuar probleme të vazhdueshme me pronat dhe trashëgiminë familjare.

Nga ana e tij, Balla u përgjigj duke thënë se “Paketa e Maleve” synon të zgjidhë pikërisht këtë situatë dhe se qytetarët duhet të ndjekin procedurat përkatëse përmes institucioneve vendore.

Debati vijoi më tej me tension, ku minatori ngriti edhe çështjen e statusit të minatorit, duke theksuar se premtimi për miratimin e tij daton që në vitin 2013 dhe nuk është realizuar ende.

Në disa momente pati ndërhyrje dhe përpjekje për të kufizuar fjalën e tij, ndërsa diskutimi u mbyll mes shkëmbimesh të drejtpërdrejta mes palëve në panel.