Një 22-vjeçar është arrestuar nga Policia e Tiranës pas një konflikti të dhunshëm të ndodhur në zonën e Bathores.

Sipas të dhënave zyrtare, ngjarja ka nisur pas një përplasjeje mes disa personave, ku i riu dyshohet se ka përplasur me automjet makinën e një 33-vjeçari.

Më pas, ai dyshohet se ka qëlluar në ajër me armë zjarri për ta frikësuar, ndërsa në vijim është konfliktuar fizikisht së bashku me persona të tjerë, duke e goditur 33-vjeçarin me grushte.

Policia ka ndërhyrë menjëherë pas njoftimit dhe ka arrestuar në flagrancë 22-vjeçarin. Gjithashtu është sekuestruar automjeti i tij, një “Range Rover”, si provë materiale.

Autoritetet po vijojnë kërkimet për gjetjen e armës së dyshuar të përdorur dhe identifikimin e personave të tjerë të përfshirë në ngjarje. Dosja i është referuar Prokurorisë së Tiranës për veprime të mëtejshme.