Dy persona janë vënë në pranga nga Policia e Tiranës dhe ajo e Krujës, në kuadër të goditjes së rasteve të shpërndarjes së lëndëve narkotike.

Sipas njoftimit zyrtar, bëhet fjalë për një 30-vjeçar nga Tirana dhe një 19-vjeçar nga Kruja, të cilët u kapën në dy operacione të veçanta policore.

Në Tiranë, 30-vjeçari u ndalua në rrugën “Mine Peza”, ku gjatë kontrollit në automjetin e tij u gjet një sasi lënde e dyshuar kokainë. Më pas, gjatë kontrollit në banesën që ai kishte marrë me qira, u zbulua edhe një sasi tjetër e së njëjtës lëndë, e dyshuar si e destinuar për shitje.

Në Krujë, gjatë kontrollit në banesën e 19-vjeçarit, policia gjeti 256 gramë cannabis sativa, që dyshohet se do të shpërndahej në zonë.

Të dy rastet po hetohen për veprën penale “Prodhimi dhe shitja e narkotikëve”, ndërsa materialet i janë referuar Prokurorisë për veprime të mëtejshme.