Një 19-vjeçare me origjinë shqiptare ka humbur jetën në rrethana të rënda në ishullin Kefaloni të Greqisë, pasi u gjet pa ndjenja në qytetin Argostoli gjatë orëve të para të mëngjesit.

E reja, e identifikuar nga mediat greke si Myrto, u transportua me urgjencë në spital, por nuk arriti të mbijetojë pavarësisht ndërhyrjes mjekësore.

Sipas hetimeve paraprake, ngjarja ka nisur në një dhomë hoteli, ku ajo kishte shkuar rreth mesnatës me një 23-vjeçar. Më vonë në dhomë janë bashkuar edhe dy persona të tjerë, një 26-vjeçar dhe një 22-vjeçar, të gjithë me origjinë shqiptare. Dyshohet se gjatë natës është konsumuar lëndë narkotike.

Në një moment, vajza ka humbur ndjenjat dhe, sipas pamjeve të sigurisë, tre të rinjtë e kanë nxjerrë jashtë dhe e kanë transportuar drejt qendrës së qytetit, ku e kanë lënë pranë një sheshi përpara se të largoheshin.

Më pas, sipas të njëjtave burime, ata janë kthyer në hotel dhe kanë pastruar dhomën, ndërsa dyshohet se është marrë edhe telefoni i viktimës. Policia i ka identifikuar përmes kamerave të sigurisë dhe ndaj tyre po hetohet për vrasje nga pakujdesia.

Shkaku i vdekjes dyshohet të jetë arrest kardiak, ndërsa analizat toksikologjike pritet të përcaktojnë nëse ka pasur ndikim të substancave të ndaluara.