Një zjarr masiv që përfshiu kompleksin “Arlis” në zonën e Farmacisë nr. 10 në Tiranë ka shkaktuar dëme të konsiderueshme materiale dhe lëndimin e disa banorëve dhe zjarrfikësve, duke vënë në alarm autoritetet dhe ngritur pikëpyetje mbi sigurinë e ndërtimeve të reja.

Drejtori i Shërbimit të Mbrojtjes nga Zjarri dhe Shpëtimit në Tiranë, Shkëlqim Goxhaj, ka zbardhur dinamikën e ngjarjes dhe arsyet e përhapjes së shpejtë të flakëve.

Operacioni për shuarjen e zjarrit, sipas tij, ka qenë i një shkalle të gjerë, duke angazhuar pothuajse të gjithë shërbimin zjarrfikës të kryeqytetit. Pas marrjes së telefonatës së parë, njësia më e afërt nga Kinostudio ka mbërritur menjëherë në vendngjarje, por situata është konstatuar si jashtë kontrollit.

Megjithatë, sipas Goxhajt, problemi kryesor nuk ka qenë vetëm madhësia e zjarrit, por shpejtësia me të cilën ai është përhapur. Ai theksoi se nuk bëhej fjalë për një incident tipik të shkaktuar nga defekte elektrike apo pakujdesi të zakonshme.

“Vështirësia në këto ngjarje është në përhapjen e shpejtë të vatrës së zjarrit”, deklaroi Goxhaj.

Sipas tij, shkaku kryesor lidhet me materialin e përdorur në fasadën e jashtme të ndërtesës, i cili ka favorizuar përhapjen vertikale të flakëve. “Ky zjarr mori përmasa sepse pjesa e jashtme e objektit e ndihmoi përhapjen e shpejtë të vatrës së zjarrit”, shtoi ai, duke theksuar se fasada ka vepruar si “ushqyes” për flakët dhe ka lejuar kalimin e tyre nga një banesë në tjetrën.