Një debat i fortë është hapur në Vlorë pas publikimit të një qëndrimi kritik nga anëtari i Këshillit Bashkiak, Gjergji Nika, lidhur me projektin për ndërtimin e një strehëze për qentë endacakë.

Në reagimin e tij, Nika sqaron se ka votuar kundër projektvendimit në komisionet përkatëse, duke e konsideruar atë si një nismë me kosto të pajustifikuara, pavarësisht se e cilëson të nevojshme në parim.

Sipas të dhënave të publikuara, projekti parashikon një fond prej rreth 260 mijë eurosh për periudhën maj–dhjetor 2026, për një strehëz me kapacitet 100 qenësh. Kjo përkthehet në një kosto prej rreth 260 euro në muaj për çdo qen.

Në detaje, shpenzimet përfshijnë paga për 6 punonjës, kosto operative si dhe investime në ambientin me qira, ku vetëm kafazet arrijnë në rreth 50 mijë euro.

Këshilltari i opozitës e ka krahasuar këtë nivel shpenzimi me mbështetjen sociale për qytetarët, duke theksuar se pensioni minimal është rreth 107 euro në muaj, ndihma ekonomike 35 euro, ndërsa ushqimi për një fëmijë në kopsht rreth 48 euro.

“Ky kontrast ngre pikëpyetje serioze mbi mënyrën e përdorimit të fondeve publike”, thekson Nika, duke kërkuar transparencë të plotë për mënyrën e përllogaritjes së kostove.

Ai shton se në buxhetin e vitit 2026, Bashkia Vlorë ka parashikuar rreth 310 mijë euro për kujdesin social, një shumë që, sipas tij, krijon një diferencë të dukshme krahasuar me fondin për strehëzën e qenve.

Deklarata e tij, ku ngre pyetjen nëse qytetarët duhet të “kafshojnë” njëri-tjetrin për të marrë të njëjtin trajtim si kafshët, ka ngjallur reagime të shumta në rrjet.

Megjithatë, Nika thekson se nuk është kundër kujdesit për kafshët, por kërkon që fondet publike të përdoren me eficiencë, transparencë dhe në përputhje me prioritetet sociale.