Policia e Shtetit dhe partnerët britanikë kanë konfirmuar forcimin e mëtejshëm të bashkëpunimit strategjik, duke e kthyer task-forcën kundër migracionit të paligjshëm në një model të suksesshëm ndërinstitucional me rezultate konkrete.

Gjatë një takimi mes Drejtorit të Përgjithshëm të Policisë së Shtetit, Skënder Hita, dhe zëvendësambasadores së Mbretëria e Bashkuar në Shqipëri, Julia Sutherland, u theksua se bashkëpunimi i deritanishëm ka sjellë një ulje të ndjeshme të rasteve të emigracionit të paligjshëm drejt Britanisë, si dhe goditje të rëndësishme ndaj grupeve të krimit të organizuar.

Drejtori Hita vlerësoi partneritetin e ngushtë me agjencitë ligjzbatuese britanike, duke e cilësuar atë një bashkëpunim pa barriera dhe me rezultate të matshme në terren.

“Ky është një partneritet i konsoliduar, me rezultate konkrete. Policia e Shtetit mbetet një partner i besueshëm dhe aktiv në garantimin e sigurisë, brenda dhe jashtë vendit,” u shpreh ai.

Bashkëpunimi mes dy vendeve po zgjerohet edhe në fusha të tjera, përfshirë Policinë Shkencore, teknologjinë e informacionit dhe kontrollin kufitar, me fokus në parandalimin e trafikut të armëve, pastrimit të parave dhe hyrjes së paligjshme të kapitaleve.

Nga ana e saj, zëvendësambasadorja Sutherland theksoi se ky partneritet do të vijojë të thellohet më tej, duke e konsideruar një shembull të suksesshëm të shkëmbimit të ekspertizës dhe besimit të ndërsjellë mes dy vendeve.