Një 33-vjeçar nga Gjirokastër është proceduar penalisht nga policia, pasi dyshohet se ka përhapur informacione të rreme në rrjetet sociale, duke pretenduar se drejtues dhe punonjës të bashkisë ishin të infektuar me HIV/AIDS.

Sipas njoftimit zyrtar, shtetasi Emin Kokalari ka publikuar këto pretendime online, çka, sipas autoriteteve, ka shkaktuar panik tek qytetarët. Materialet janë referuar në Prokurori për veprën penale “Përhapja e informatave të rreme që ngjallin panik”, ndërsa telefoni i tij celular është sekuestruar si provë materiale.

Paralelisht me zhvillimet, në media ka qarkulluar një dokument mjekësor që lidhet me kryebashkiakun Flamur Golemi, sipas të cilit ai rezulton negativ për HIV nga analizat e kryera në fund të vitit 2025 në Janinë. Publikimi i këtij dokumenti ka shtuar debatet dhe ka ngritur pikëpyetje në opinionin publik.

Ndërkohë, procedimi i menjëhershëm i të riut ka hapur diskutime mbi mënyrën se si trajtohen raste të tilla, sidomos kur bëhet fjalë për informacione që, të sakta apo jo, prekin interesin publik.

Në këtë situatë, mbetet për t’u sqaruar nëse kemi të bëjmë thjesht me një rast të përhapjes së një lajmi të rremë apo me një çështje që kërkon më shumë transparencë dhe verifikim nga institucionet përkatëse.