Orë paniku janë shënuar ditën e sotme në Patos, pas një telefonate alarmuese që ka vënë në lëvizje Policinë e Fierit dhe atë të Patosit.

Sipas njoftimit paraprak, në sallën operative ka mbërritur një thirrje nga një person, i cili ka deklaruar se kishte vrarë bashkëshorten e tij në zonën e Dukasit, Patos. Menjëherë pas sinjalizimit, shërbimet e policisë janë nisur drejt vendngjarjes, duke marrë të gjitha masat dhe duke shkuar me urgjencë në adresën e dhënë.

Pas mbërritjes në vend dhe verifikimeve të kryera, ka rezultuar se ngjarja e raportuar nuk ishte e vërtetë. Burime nga policia bëjnë me dije se personi që kishte bërë telefonatën ndodhej në gjendje të dehur dhe kishte dhënë një alarm të rremë, duke shkaktuar mobilizim të menjëhershëm të forcave të rendit.

Fatmirësisht, nga verifikimet nuk është konstatuar asnjë ngjarje kriminale dhe nuk ka persona të dëmtuar. Autoritetet kanë bërë të ditur se ndaj shtetasit në fjalë do të merren masa ligjore për njoftim të rremë dhe shqetësim të strukturave të policisë.

Ngjarja ka shkaktuar panik të përkohshëm në zonë, por situata është rikthyer në normalitet pas sqarimit të plotë të rastit nga policia.