Gjetjet e një studimi të fundit sugjerojnë se konsumimi i lëngut të panxharit mund të ndikojë në përmirësimin e përbërjes së baktereve në gojë, të cilat lidhen me funksionin e shëndetshëm të trurit dhe enëve të gjakut.

Panxhari, së bashku me perime të tjera si marulja, spinaqi dhe selinoja, është i pasur me nitrate inorganike. Në gojë, disa baktere të caktuara luajnë rol në shndërrimin e këtyre nitrateve në oksid nitrik, një substancë e rëndësishme që ndihmon në rregullimin e enëve të gjakut dhe në transmetimin e sinjaleve kimike në tru.

Sipas studiuesve, prodhimi i oksidit nitrik tenton të ulet me moshën, një fenomen që lidhet me përkeqësim të funksionit vaskular dhe njohës te të moshuarit.

Në studim morën pjesë 26 persona të moshuar, të cilët u ndoqën në dy periudha 10-ditore: njëra me konsum të lëngut të panxharit të pasur me nitrate dhe tjetra me një placebo pa nitrate. Secili pjesëmarrës e konsumoi lëngun dy herë në ditë.

Rezultatet treguan një ndryshim në mikrobiomën orale, me rritje të baktereve të lidhura me shëndet më të mirë vaskular dhe njohës, si dhe ulje të baktereve të lidhura me inflamacionin dhe sëmundjet.

Gjithashtu, u vu re një ulje mesatare prej rreth pesë njësish (mmHg) në presionin sistolik të gjakut pas konsumimit të lëngut të panxharit, duke sugjeruar një efekt potencial pozitiv në shëndetin kardiovaskular.

Studiuesit theksojnë se rezultatet janë premtuese, por kërkojnë studime më të gjera për të konfirmuar efektet afatgjata dhe mekanizmat e saktë të këtij ndikimi.