Në seancën plenare të Kuvendit, deputetja e Partisë Demokratike Jorida Tabaku akuzoi qeverinë për bllokim të procesit të integrimit europian të Shqipërisë gjatë 12 viteve të fundit.

Ajo iu referua edhe debatit mbi raportet e fundit të institucioneve europiane, duke theksuar se Parlamenti Europian pritet të shqyrtojë një raport më 5 maj, ku ngrihen një sërë shqetësimesh për funksionimin e institucioneve në Shqipëri.

Sipas Tabakut, raporti i kërkon Kuvendit të përfshijë opozitën në procedurat parlamentare, të respektojë vendimet e Gjykatës Kushtetuese dhe të shmangë mbrojtjen politike të zyrtarëve të dyshuar për korrupsion.

“Parlamenti duhet të ketë një proces që nuk miraton ligje që shkelin direktivat e BE-së… Këtë e thotë edhe raporti që Komisioni i Jashtëm i PE do të miratojë,” deklaroi ajo.

Tabaku kritikoi gjithashtu mënyrën e miratimit të ligjeve, duke e cilësuar atë si të shpejtë dhe pa debat parlamentar.

Ajo iu referua edhe çështjes së imunitetit të zyrtarëve të lartë, duke përmendur rastin e ish-zv.kryeministres Belinda Balluku, duke thënë se vendimet e fundit nuk janë në përputhje me standardet e integrimit.

“Në 3 muajt e fundit janë miratuar ligje që cenojnë procesin në secilin grup-kapitull. Kjo nuk është në mbështetje të integrimit,” tha ajo.

Në përfundim, Tabaku theksoi se procesi i integrimit të Shqipërisë në BE mbetet i bllokuar dhe kërkon reflektim politik të menjëhershëm.

Debati mbi integrimin europian dhe funksionimin e Kuvendit vijon të mbetet një nga temat kryesore të përplasjes mes mazhorancës dhe opozitës.