Drejtoria e Përgjithshme e Burgjeve ka zhvilluar një kontroll të befasishëm në një institucion të ekzekutimit të vendimeve penale, në zbatim të urdhrit të drejtorit të përgjithshëm, Adriatik Kupi.

Operacioni është realizuar nën drejtimin e Drejtorisë së Policisë së Burgjeve, ku Forcat Operacionale dhe ato Speciale kanë ushtruar kontrolle në 38 dhoma banimi dhe në ambientet e përbashkëta të institucionit.

Gjatë verifikimeve, në dhomën nr. 9 të Godinës 1, ku qëndronin dy të dënuar me inicialet R.M. dhe E.H., është konstatuar një cigare e dëmtuar e hedhur në lavaman, e dyshuar si lëndë narkotike. Të dënuarit janë veçuar menjëherë dhe është mbajtur raport incidenti, ndërsa rasti është marrë në shqyrtim edhe nga strukturat e Shërbimit të Kontrollit të Brendshëm në Burgje.

Po ashtu, gjatë kontrollit janë gjetur dhe sekuestruar sende të ndaluara, përfshirë edhe dy televizorë që janë marrë për rikontroll, si dhe objekte të tjera që nuk lejohen në ambientet e burgut.

Drejtoria e Burgjeve bën me dije se kontrolle të tilla do të vijojnë në mënyrë të rregullt në të gjitha institucionet penitenciare, me synim forcimin e sigurisë dhe ruajtjen e rendit.