Një 32-vjeçar është vënë në pranga në Kavajë, në kuadër të operacionit policor të koduar “Fast”, i dyshuar për armëmbajtje pa leje.

Sipas Policisë së Shtetit, shërbimet e Komisariatit të Kavajës, në bashkëpunim me forcat operacionale të Durrës, zhvilluan kontrolle intensive pas informacioneve për persona që qarkullonin të armatosur.

Gjatë operacionit, në lagjen nr. 2 të qytetit u lokalizua dhe u ndalua shtetasi Florjan Rrokaj, 32 vjeç, i cili lëvizte në këmbë. Në kontrollin fizik ndaj tij, policia gjeti dhe sekuestroi një armë zjarri pistoletë, së bashku me municion luftarak, që dyshohet se e posedonte pa leje.

Në përfundim të veprimeve, ai u arrestua në flagrancë, ndërsa materialet procedurale iu referuan Prokurorisë së Durrësit për hetime të mëtejshme për veprën penale “Mbajtja pa leje dhe prodhimi i armëve dhe municionit”.