Vëllai i Liridona Ademajt, Leonardi, ka reaguar me një mesazh falënderues dhe emocional pas zhvillimeve në procesin gjyqësor për vrasjen e motrës së tij, duke vlerësuar punën e institucioneve të drejtësisë dhe mbështetjen e publikut.

Në një shkrim në Facebook, ai falënderoi hetuesit, policinë, prokurorinë, gjykatën, mediat dhe të gjithë ata që kanë ndjekur dhe mbështetur çështjen, duke theksuar se reagimi i shoqërisë dhe institucioneve ka qenë vendimtar në këtë proces.

“Faleminderit të gjithëve që reaguan dhe na qëndruan pranë. Pikëllimi është i madh, por solidariteti dhe drejtësia na kanë dhënë forcë,” shkruan ai ndër të tjera.

Leonardi theksoi se rasti i Liridonës duhet të shërbejë si një pikë kthese për shoqërinë, duke bërë thirrje që dhuna ndaj grave të mos tolerohet më.

“Kosova duhet të bëhet një vend ku asnjë çikë, asnjë grua nuk duhet të maltretohet, sulmohet apo vritet. Femicidi duhet të marrë fund,” deklaroi ai.

Ai shtoi gjithashtu se familja Ademaj do të mbështesë çdo iniciativë që synon parandalimin e dhunës me bazë gjinore dhe mbrojtjen e grave në shoqëri.