Një punëtor shqiptar ka humbur jetën në Firence, disa ditë pasi u aksidentua rëndë në një kantier ndërtimi.

Ngjarja ndodhi më 27 prill në zonën e Castelfiorentino, ku punëtori u godit nga mikseri i betonieres gjatë punës dhe mori plagë të rënda. Sipas raportimeve, edhe kamioni që ai drejtonte është përmbysur, duke rënduar më tej gjendjen e tij.

Menjëherë pas aksidentit, ai u transportua me helikopter drejt spitalit CTO Careggi, në gjendje kritike. Pavarësisht përpjekjeve të mjekëve, 3 ditë më pas ai ka ndërruar jetë si pasojë e plagëve të marra.

Në vendngjarje ndërhynë shërbimet e emergjencës, zjarrfikësit dhe specialistët e sigurisë në punë, ndërsa i plagosuri u intubua në terren përpara transportimit urgjent.

Ndërkohë, karabinierët dhe autoritetet shëndetësore lokale kanë nisur hetimet për të zbardhur rrethanat e plota të aksidentit në punë. Emri i viktimës nuk është bërë ende publik.