Tiana Krasniqi, 31 vjeç, me origjinë shqiptare, ka reaguar ashpër ndaj autoriteteve në Teksas pas ekzekutimit të bashkëshortit të saj, James Broadnax.

37-vjeçari u ekzekutua me injeksion vdekjeprurës në burgun shtetëror në Huntsville, pasi ishte dënuar me vdekje për vrasjen e dy producentëve muzikorë në vitin 2008, në Garland.

Sipas prokurorëve, Broadnax dhe kushëriri i tij kishin qëlluar për vdekje dhe grabitur dy viktimat në një parking studioje regjistrimi. Ndërkohë, bashkëpunëtori i tij u dënua me burgim të përjetshëm pa mundësi lirimi me kusht.

Gjatë momentit të ekzekutimit, në sallë ishin të pranishëm edhe familjarë të viktimave, ndërsa raportimet tregojnë se procesi u shoqërua me reagime emocionale nga të dyja palët.

Pas ngjarjes, Tiana Krasniqi reagoi në rrjetet sociale, duke ngritur akuza të forta për mënyrën e ekzekutimit.

“Ata vranë burrin tim. Burri im vuajti aq keq nga injeksioni vdekjeprurës saqë i doli gjak nga hunda dhe i doli mavijosje në qafë. Familjet qeshën ndërsa shikonin. A është kjo drejtësi?”, shkroi ajo.

Mediat ndërkombëtare raportojnë se çifti ishte martuar vetëm pak ditë para ekzekutimit, në një ceremoni të zhvilluar brenda një burgu në Teksas.

Autoritetet amerikane nuk kanë komentuar publikisht mbi pretendimet e bëra nga bashkëshortja e të ekzekutuarit.