Prokuroria e Posaçme kundër Korrupsionit dhe Krimit të Organizuar (SPAK) ka dhënë pretencën për shtetasin kosovar Shpend Sokoli, duke kërkuar dënimin e tij me 6 vite burg për veprën penale të mashtrimit kompjuterik.

Sipas hetimeve, Sokoli dyshohet se ka qenë i përfshirë në aktivitetin e një rrjeti të paligjshëm online të njohur si RYDOX, i cili operonte prej vitit 2016 dhe ofronte shërbime të paligjshme në fushën e spam-it dhe mashtrimeve dixhitale.

Hetimi i përbashkët mes autoriteteve shqiptare dhe FBI zbuloi se platforma promovonte forumin kriminal RaidForums, ku shiteshin të dhëna të vjedhura, mjete për shpërndarjen e tyre dhe udhëzime për përdorim.

Në kuadër të këtij operacioni, dy bashkëpunëtorë të dyshuar, Ardit dhe Jetmir Kutleshi, janë ekstraduar më herët drejt SHBA, ndërsa një tjetër person i përfshirë është proceduar në Shqipëri me gjykim të shkurtuar.

Nga të dhënat e hetimit rezulton se rrjeti kishte rreth 18 mijë përdorues dhe kryente transaksione virtuale përmes aktiviteteve të paligjshme.

Nga ana e tij, Sokoli ka mohuar akuzat, duke deklaruar se nuk ka pasur akses në platformën “RYDOX” dhe se ka punuar vetëm në programim sipas kërkesave, pa pasur dijeni për aktivitetin kriminal.