Detaje të reja janë zbardhur nga mbytja e superjahtit “Bayesian” në brigjet e Siçili, ku humbën jetën shtatë persona, mes tyre miliarderi britanik i teknologjisë Mike Lynch dhe vajza e tij Hannah. Ngjarja e rëndë ndodhi në gusht të vitit 2024, pranë Palermo.

Sipas hetimeve të autoriteteve italiane, dyshohet se mbytja e jahtit nuk ka ardhur si pasojë direkte e motit të keq, por mund të lidhet me neglizhencë njerëzore. Prokurorët kanë nisur verifikimet për përgjegjësi të mundshme penale ndaj kapitenit dhe dy anëtarëve të ekuipazhit, për veprat e shkaktimit të mbytjes nga pakujdesia dhe vdekjes së personave pa dashje.

Gjithashtu, po shqyrtohet edhe mundësia e përgjegjësisë nga ana e ndërtuesit të jahtit, nëse do të konstatohet ndonjë problem teknik apo strukturor.

Nga një raport paraprak i MAIB rezulton se pasagjerët kanë tentuar të shpëtojnë duke përdorur një “shkallë të improvizuar”, pasi anija u përmbys papritur.

Sipas të dhënave, rreth orës 04:06 të mëngjesit era është forcuar ndjeshëm dhe brenda pak sekondash jahti është anuar deri në 90 gradë, duke e bërë të pamundur reagimin në kohë. Disa minuta më pas, anija u fundos.

Në mesin e viktimave ishin edhe biznesmeni Jonathan Bloomer dhe bashkëshortja e tij, si dhe avokati Chris Morvillo me bashkëshorten e tij.

Operacioni për nxjerrjen e mbetjeve të jahtit nga fundi i detit ka zgjatur disa muaj, ndërsa hetimet vijojnë për të përcaktuar shkaqet e plota të kësaj tragjedie.