Një operacion i gjerë policor është duke u zhvilluar në Elbasan, në bashkëpunim me SPAK, në kuadër të goditjes së një grupi të dyshuar për trafik ndërkombëtar të lëndëve narkotike.

Sipas informacioneve paraprake, bëhet fjalë për një organizatë kriminale me rreth 26 anëtarë, ndërsa 5 persona të tjerë janë shpallur në kërkim. Gazetari Edison Vatnikaj raporton se deri më tani janë arrestuar 10 persona gjatë operacionit të sotëm, ndërsa 8 të tjerë janë arrestuar në faza të mëparshme të hetimit.

Hetimet janë mbështetur në zbardhjen e komunikimeve në aplikacionin “Sky”, përmes të cilave dyshohet se janë identifikuar individë të përfshirë në trafikun e kokainës nga vendet e Amerikës Latine drejt disa shteteve të Evropës.

Në terren kanë zbarkuar forcat speciale, përfshirë RENEA dhe FNSH, të cilat po ekzekutojnë vendimet e gjykatës dhe po ushtrojnë kontrolle në disa banesa.

Operacioni shtrihet në disa zona të qarkut, përfshirë Prrenjas, Librazhd dhe zona të tjera përreth. Mësohet se janë lëshuar 20 urdhër-kontrolle dhe 18 urdhër-arreste, ndërsa disa persona janë shoqëruar për verifikime të mëtejshme.

Aksioni vijon, ndërsa pritet që autoritetet të japin detaje të tjera mbi strukturën dhe aktivitetin e plotë të grupit kriminal.