Deputeti i Partisë Demokratike, Belind Këlliçi ka denoncuar në sallën e Kuvendit atë që e cilësoi si një skandal të ri me ndërtime luksoze në Tiranë.

Këlliçi ka shfaqur një foto satelitore ku, sipas tij, duken tetë vila luksoze të ndërtuara në zonën pas TEG, ndërsa ngriti dyshime mbi ligjshmërinë e tyre dhe personat që mund të fshihen pas investimit.

“Janë shfaqur 8 vila luksoze në Tiranë, pa zhurmë, në heshtje… Pyetjet lindin natyrshëm! Cili shef apo zyrtar banon aty? A është dhënë leje ndërtimi për këto vila? A është respektuar ligji? Bëni transparencë!”, deklaroi Belind Këlliçi gjatë denoncimit të tij.

Deputeti demokrat kërkoi transparencë nga institucionet përgjegjëse lidhur me procedurat e ndjekura për ndërtimin e vilave, ndërsa hodhi dyshime se projekti mund të jetë realizuar në mënyrë të fshehtë dhe në favor të zyrtarëve të lartë.