Kryetari i Partisë Demokratike, Sali Berisha, ka bërë deklarata të forta gjatë një prononcimi për mediat, duke akuzuar kryeministrin Edi Rama se ka nxjerrë nga “arresti i shtëpisë” drejtuesen e AKSHI-t, Mirlinda Karçanaj.

Sipas Sali Berisha, Karçanaj i kishte dërguar një ultimatum kryeministrit.

“Ajo i çoi ultimatum, ose më nxirr ose këtu te unë do vijë Linda jote. Ndaj dhe ne jemi shqiptarë që nuk pajtohemi kurrë me këta horra. Ne jemi shqiptarë që nuk pajtohemi kurrë me këta vjedhës, me këta hajdutë”, deklaroi Berisha.

Më tej, kreu i PD-së shtoi se opozita nuk do të ndalet në betejën e saj politike ndaj qeverisë.

“Ne nuk pajtohemi me këta kriminelë. Edhe njëherë, ja vdekje ja liri, ne do të fitojmë. Beteja vazhdon. Edhe më të pamposhtur. Edhe më të fuqishëm. Edhe më të vendosur se kurrë më parë”, u shpreh Sali Berisha.