Një ngjarje e rëndë ka tronditur qytetin Besançon në Francë, ku një 36-vjeçare shqiptare u gjet pa shenja jete në banesën e saj. Policia franceze ka vënë në pranga bashkëshortin e saj 50-vjeçar, i cili dyshohet për përfshirje në ngjarje.

Sipas autoriteteve franceze, 50-vjeçari nuk ishte një emër i panjohur për policinë, pasi rezultonte me precedentë për dhunë në familje ndaj viktimës. Megjithatë, ndaj tij nuk kishte një urdhër ndalimi që ta pengonte të kontaktonte me bashkëshorten.

Mediat franceze raportojnë se ishte vetë 50-vjeçari ai që njoftoi shërbimet e urgjencës, i shoqëruar nga vajza e tij. Ai konsiderohet personi i fundit që ka parë gjallë 36-vjeçaren, ndërsa ka mohuar çdo përfshirje në vdekjen e saj.

Hetimet paraprake tregojnë se viktima kishte shenja të një sindrome asfiksie. Sipas prokurorisë së Besançon, kjo mund të jetë shkaktuar “ose nga marrja e medikamenteve, ose nga ndërhyrja e një personi të tretë”.

Prokuroria ka nisur hetim për “vrasje të bashkëshortit/bashkëshortes”, por hetuesit theksojnë se në këtë fazë ka ende pak prova që e konfirmojnë pistën e femicidit. Në apartament nuk janë konstatuar shenja përleshjeje, gjurmë gjaku apo dëmtime të dukshme në trupin e viktimës, përveç një shenje të vogël në qafë, e cila ende nuk konsiderohet përcaktuese.

Autopsia dhe analizat toksikologjike, që pritet të kryhen gjatë ditës së sotme, do të hedhin më shumë dritë mbi shkakun e vdekjes.

Çifti, me origjinë nga Kosova dhe Shqipëria, kishin disa fëmijë së bashku. Deri më tani autoritetet nuk kanë bërë publik identitetin e viktimës dhe as të bashkëshortit të arrestuar.