Policia e Shtetit ka zbardhur detaje të reja nga vrasja e biznesmenit Rexhep Ismaili, ngjarje që tronditi mbrëmjen e së enjtes Sarandë.

Në një deklaratë për mediat, drejtori i Policisë së Vlorës, Elidon Çela, bëri të ditur se konflikti nisi në lokalin e viktimës pranë kryqëzimit të fshatit Gjashtë, ku disa persona u përfshinë fillimisht në përplasje fizike me sende të forta.

Sipas hetimeve paraprake, në lokal kishin mbërritur Lulzim Tabaku, Idriz Çela, Eljo Muço, Kostandin Vogli, Marjo Agalliu dhe Ermal Shkalla. Ata janë afruar te tavolina ku ndodhej Tori Ruçi së bashku me viktimën dhe persona të tjerë.

Policia thotë se gjatë konfliktit Rexhep Ismaili ka marrë një armë automatike dhe ka qëlluar në drejtim të grupit, ndërsa më pas dyshohet se Lulzim Tabaku ka reaguar duke e qëlluar me pistoletë 66-vjeçarin, i cili humbi jetën në vendngjarje.

Gjatë shkëmbimit të zjarrit mbeti i plagosur në këmbë edhe Kostandin Vogli, i cili ndodhet jashtë rrezikut për jetën dhe është shoqëruar nga policia për procedurat hetimore.

Pas krimit, të gjithë personat e përfshirë u larguan nga vendngjarja, ndërsa policia ngriti postblloqe dhe zhvilloi kontrolle intensive në disa zona të Sarandë dhe Delvinë.

Hetuesit dyshojnë se Hajredin Ismaili ka fshehur armën automatike të përdorur gjatë konfliktit, së bashku me një krehër me 21 fishekë. Arma u gjet më pas dhe u sekuestrua si provë materiale.

Uniformat blu sekuestruan gjithashtu një Audi Q8, fishekë, gëzhoja dhe prova të tjera që pritet të ndihmojnë në zbardhjen e plotë të ngjarjes. Në fshatin Nivicë u gjet edhe motomjeti me të cilin dyshohet se është larguar autori i krimit.

Në përfundim të veprimeve të para hetimore, policia shpalli në kërkim Lulzim Tabaku për “Vrasje me dashje” dhe “Armëmbajtje pa leje”, ndërsa pesë personat e tjerë për “Kanosje” dhe “Shkatërrim prone”. Ndaj Hajredin Ismaili nisi procedim penal për fshehje të armës së zjarrit.