SPAK ka dhënë këtë të premte pretencën për Plaurent Dervishaj dhe Julian Meçe, të akuzuar për atentatin ndaj ish-prokurorit Arjan Ndoja dhe Aleksandër Laho, ngjarje ku humbi jetën shoferi Andi Maloku.

Prokurori i SPAK-ut, Adnan Xholi, kërkoi burgim të përjetshëm për Plaurent Dervishaj, ndërsa për Julian Meçe u kërkua dënimi me 35 vite burg. Pretenca u paraqit në mungesë të dy të pandehurve.

Atentati ndodhi më 1 nëntor 2019 pranë mbikalimit të Shkozetit në Durrës. Në automjet ndodheshin Arjan Ndoja, Aleksandër Laho dhe Andi Maloku.

Sipas hetimeve, automjeti tip “Benz” me targë AA 333 ZD, në përdorim nga Ndoja, u qëllua me breshëri automatiku nga një tjetër makinë në ecje. Pas sulmit, automjeti doli nga rruga, ndërsa të plagosurit u transportuan drejt spitalit me një mjet tjetër privat.

Andi Maloku, ish-punonjës policie dhe shofer i ish-prokurorit, ndërroi jetë një javë më vonë në spital si pasojë e plagëve të marra.

Në atentat mbetën të plagosur edhe Arjan Ndoja dhe Aleksandër Laho, ky i fundit një personazh i njohur për drejtësinë me precedentë penalë.

Pas ngjarjes, kryeministri Edi Rama e kishte përfshirë Ndojën në listën e personave që ai i cilësonte si pjesë e grupit “KÇK”, me referencë ndaj prokurorëve dhe gjyqtarëve që sipas tij “e shfrytëzojnë pushtetin me moton ‘të kapim çfarë të kapim’”.