Një ngjarje e rëndë ka tronditur qytetin Piacenza, ku një 60-vjeçar me origjinë maqedonase dyshohet se ka vrarë bashkëshorten e tij brenda banesës familjare.

Sipas mediave italiane, i dyshuari, Hako Vitanov, ka telefonuar vetë numrin e emergjencës 112 menjëherë pas krimit, duke deklaruar: “Ejani, kam vrarë gruan time”.

Pak më pas, ai është larguar nga vendi i ngjarjes dhe për disa orë ka qenë në arrati. Forcat e rendit dhe karabinierët mbërritën në apartamentin ku jetonte çifti, në katin e gjashtë të një pallati në periferi të Piacenza, ku gjetën të pajetë 56-vjeçaren Milena Vitanova.

Viktima u gjet e shtrirë në sallon, pranë divanit, në një pellg gjaku, ndërsa pranë trupit ishte edhe një thikë që dyshohet se është përdorur në krim. Hetimet paraprake tregojnë se ajo kishte shenja mbrojtjeje në duar, çka sugjeron se ka tentuar t’i rezistojë sulmit.

Pas rreth dy orësh kërkimesh, policia e gjeti të dyshuarin në zonën e varrezave monumentale të Piacenza, pranë varrit të djalit të tij të ndjerë. Sipas autoriteteve, Hako Vitanov kishte tentuar të vetëlëndohej, por u ndalua në kohë dhe u shoqërua në komisariat.

Çifti kishte katër fëmijë, dy prej të cilëve ishin larguar te një i afërm pak para ngjarjes tragjike. Banesa është sekuestruar nga autoritetet italiane, ndërsa hetimet vijojnë për zbardhjen e plotë të motivit dhe rrethanave të krimit.