Tre persona kanë humbur jetën në një aksident të rëndë rrugor në zonën Cà Lino di Chioggia, në provincën e Venecia, pasi një minivan me nëntë pasagjerë ka dalë nga rruga dhe është përmbysur në një kanal.

Sipas autoriteteve italiane, pas ndërhyrjes së ekipeve të shpëtimit dhe nxjerrjes së mjetit me vinç, në brendësi të automjetit u gjetën trupat e pajetë të tre burrave. Gjashtë personat e tjerë arritën të dilnin vetë nga mjeti dhe u shpëtuan pa rrezik për jetën.

Në operacionin e shpëtimit morën pjesë zjarrfikësit nga Chioggia dhe Cavarzere, një ekip zhytësish nga Venecia, si dhe një vinç i ardhur nga Mestre.

Shkaqet e aksidentit mbeten ende të paqarta dhe janë nën hetim nga autoritetet italiane, të cilat po punojnë për të zbardhur plotësisht dinamikën e ngjarjes tragjike.