Ish-deputeti Petrit Vasili ka reaguar ashpër pas shqyrtimit të masës së sigurisë ndaj Ilir Meta, duke deklaruar se vendimi unifikues i Gjykata e Lartë ndryshon tërësisht qasjen ligjore mbi mbajtjen në burg të një të pandehuri.

Sipas Vasilit, vendimi i datës 4 maj përcakton qartë se barra për të justifikuar vazhdimin e masës “arrest me burg” i takon prokurorisë dhe jo mbrojtjes.

“Barra e justifikimit të nevojës për caktimin dhe vijimin e masës së arrestit me burg i takon prokurorisë. Vendimmarrja e gjykatës nuk mund të kushtëzohet nga paraqitja ose jo e provave nga i pandehuri”, u shpreh Vasili.

Ai akuzoi SPAK se ka shpërfillur vendimin unifikues duke pretenduar se mbrojtja nuk kishte paraqitur prova, ndërsa insistoi se ndaj Metës nuk ekziston asnjë rrezik arratisjeje apo prishjeje provash.

“E ke rrëmbyer zotin Ilir Meta duke u kthyer në Shqipëri, nuk ekzistonte rreziku i largimit. Ka më shumë se 12 vite që nuk ushtron funksione ekzekutive. Çfarë provash do të ndikojë ai?”, deklaroi Vasili.

Në reagimin e tij, ai e cilësoi mbajtjen në izolim të ish-presidentit si një “persekutim politik” dhe paralajmëroi se zbatimi selektiv i ligjit cenon rëndë standardet e drejtësisë.

“Çdo drejtësi e bërë në mënyrë selektive, çdo drejtësi e bërë me shënjestër politike, është një drejtësi mafioze”, tha ai.

Vasili theksoi gjithashtu se procesi duhet të garantojë standarde të barabarta për çdo qytetar, pavarësisht bindjeve politike apo pozicionit publik.

“Edhe kundërshtari im politik meriton një proces të drejtë. Garancia procedurale duhet t’u sigurohet të gjithëve”, përfundoi ai.