Qeveria e Kuba ka refuzuar një ofertë ndihme humanitare prej 100 milionë dollarësh nga Shtetet e Bashkuara të Amerikës, në një periudhë kur vendi po përballet me pasoja të rënda nga uraganet, mungesë të karburantit dhe një krizë ekonomike të thelluar.

Sekretari amerikan i Shtetit, Marco Rubio, ka deklaruar se ndihma ishte e destinuar për popullin kuban, por sipas tij autoritetet në Havana nuk kanë pranuar që ajo të shpërndahej. Ai shtoi se më herët Shtetet e Bashkuara kanë ofruar rreth 6 milionë dollarë ndihmë përmes organizatave humanitare si Caritas dhe Kishës Katolike.

Nga ana tjetër, Ministria e Jashtme e Kubës ka mohuar ekzistencën e një oferte të tillë në formën e deklaruar nga Uashingtoni, duke e cilësuar atë si të pavërtetë dhe duke akuzuar SHBA-në se po përdor situatën humanitare për qëllime politike. Havana zyrtare thekson se kriza aktuale në vend është e lidhur edhe me sanksionet amerikane, të cilat sipas saj kanë ndikuar drejtpërdrejt në ekonominë dhe furnizimin me energji.

Përplasja e re diplomatike vjen në një moment të ndjeshëm për Kubën, ku situata humanitare dhe ekonomike mbetet e tensionuar, ndërsa mungesa e konsensusit mes dy vendeve vijon të thellohet.