Rasti i 25-vjeçares Xhuana Nikollaj vijon të shkaktojë reagime dhe hetime, dy muaj pas ngjarjes së rëndë që tronditi opinionin publik.

Sipas hetimeve paraprake, e reja dyshohet se i dha fund jetës pas një historie të pretenduar dhune nga ish-partneri i saj Eraldo Fizi.

Në një letër publike, motra e saj, Silvana Nikollaj, ka kërkuar drejtësi dhe zbardhje të plotë të rrethanave, duke apeluar ndaj institucioneve për transparencë dhe veprime konkrete.

“Për ne si familje, humbja e Xhuanës është një dhimbje që nuk përshkruhet me fjalë. Po mundohemi të qëndrojmë të fortë, por është shumë e vështirë, sidomos për prindërit tanë, të cilëve u është shkatërruar jeta”, shkruan ajo.

Familja ngre shqetësimin se ende ka shumë paqartësi rreth ngjarjes dhe kërkon që organet e drejtësisë të veprojnë pa vonesë për zbardhjen e plotë të rastit.

“Presim më shumë transparencë, veprime konkrete dhe zbardhjen e së vërtetës. Kërkojmë që Eraldo Fizi të kapet sa më shpejt dhe të përballet me ligjin për dhunën e ushtruar”, thuhet në letrën e saj.

Në fund, familja i bën thirrje institucioneve dhe shoqërisë që rasti të mos harrohet dhe të vijojë vëmendja ndaj tij deri në sqarimin e plotë të ngjarjes.