Ish-deputeti Ervin Salianji ka komentuar situatën brenda Partia Demokratike, pasi nuk u lejua të garonte për kreun e partisë përballë Sali Berisha.

I ftuar në një emision televiziv, Salianji u ndal edhe te largimi nga lëvizja e nisur prej tij i figurave si Ilir Alimehmeti dhe Aulon Kalaja, ndërsa deklaroi se pakënaqësia ndaj drejtimit të Berishës brenda PD-së është shumë më e madhe nga sa duket publikisht.

“Situata është kjo: 80% e demokratëve janë të pakënaqur me drejtimin e tij. Po të jepej mundësia për votim të fshehtë, ai e di që do t’i dilnin kundër. Së pari, ai nuk duhet të kandidojë fare sipas statutit dhe ligjit të partisë”, u shpreh Salianji.

Ai tha se nuk e ka çuar çështjen në gjykatë, pasi ka preferuar një zgjidhje politike brenda partisë.

“Nuk e kam çuar në gjykatë sepse kam dashur të ketë një zgjidhje politike. Unë po kërkoj që PD të jetë fituese. Ndërkohë ai thotë: ‘Pse e do fituese, se je mirë me Ramën’”, deklaroi ish-deputeti.

Duke komentuar largimin e figurave të njohura nga lëvizja e tij, Salianji tha se nuk e di kë do të mbështesin Ilir Alimehmeti dhe Aulon Kalaja në garën e brendshme të PD-së.

“Unë nuk e di kë do votonin Alimehmeti dhe Kalaja. Kur Edi Rama doli kundër Fatos Nano, kë kishte në krah? Askënd”, tha ai.

Salianji theksoi se lëvizja e nisur prej tij ka prodhuar efekte konkrete brenda partisë, duke përmendur edhe emërimet e fundit në strukturat e PD-së.

“Po nuk ikën këta që nga roje koteci, nuk fiton dot. Unë e kam arritur një qëllim. Me një kafe, njëri u bë kryetar. Më i votuari në listën e Durrësit u bë kryetar në Krujë. Tjetri pritet të jetë kandidat për Bashkinë e Tiranës. Nuk i përfillnin më parë. Si mund të thuhet që nuk kam arritur gjë? Edhe kjo është pjesë e strategjisë”, deklaroi ai.

Në fund, ish-deputeti nënvizoi se beteja e tij nuk synon dëmtimin e Partia Demokratike, por rikthimin e saj në një forcë konkurruese.

“Nuk ndihmoj Berishën, unë do të shkoj te vota sepse dua që PD të fitojë. Nuk dua të shkatërroj PD-në. Figurat duhen për të sjellë njerëz, por nëse një figurë publike largon njerëzit, atëherë këtë problem duhet ta zgjidhim”, përfundoi Salianji.