Një 42-vjeçar serb është arrestuar nga autoritetet në Shkup, pas dyshimeve se po përgatiste një vrasje me pagesë.

Arrestimi u realizua në kuadër të një operacioni të përbashkët mes policisë së Maqedonia e Veriut dhe autoriteteve serbe, pas informacioneve operative për aktivitetin e tij kriminal.

Gjatë kontrollit dhe bastisjes, policia zbuloi një arsenal armësh dhe pajisjesh të dyshuara për përdorim kriminal.

Mes sendeve të sekuestruara janë një pistoletë tip CZ, një thikë ushtarake si edhe një uniformë e zezë.

Sipas hetimeve paraprake, 42-vjeçari kishte hyrë ilegalisht në territorin e Maqedonia e Veriut.

Autoritetet bëjnë me dije se atij iu gjet edhe një kartë identiteti serbe që i përkiste një personi tjetër, dokument që dyshohet se përdorej për identitet të rremë.

Nga të dhënat hetimore rezulton se i arrestuari ka lidhje me grupe të krimit të organizuar dhe se kishte mbërritur në Shkup me një “detyrë specifike”.

Institucionet kompetente po vijojnë hetimet për të identifikuar personin që ka porositur atentatin, motivet e mundshme si dhe bashkëpunëtorët e tjerë që mund të jenë përfshirë në këtë plan kriminal.