Deputetja e Partia Demokratike, Jorida Tabaku, ka kërkuar praninë e kryeministrit Edi Rama dhe kryenegociatores në seancën plenare ku po diskutohet për integrimin europian dhe raportin e progresit.

Sipas Tabakut, debati për procesin e integrimit nuk mund të konsiderohet i plotë pa praninë e drejtuesve kryesorë të këtij procesi.

“Zoti kryetar, jeni dëshmitar që për herë të parë në këtë legjislaturë po raportohet për integrimin. Kemi kërkuar që ky proces të jetë i hapur dhe kjo nuk ka ndodhur. Debati nuk mund të jetë i plotë nëse Rama dhe kryenegociatorja nuk janë këtu”, deklaroi ajo.

Deputetja demokrate kritikoi edhe përmbajtjen e raportit të paraqitur nga mazhoranca, duke thënë se ai përfshin vetëm ligje dhe vendime të qeverisë, por jo thelbin e reformave që kërkon Bashkimi Europian.

“Për herë të parë, pasi kemi vite që lexojmë raporte, qeveria ka sjellë vetëm ligje. 50 faqe ligje e VKM. Nuk është ky procesi i integrimit, është reforma, vendimet politike të qeverisë, ndryshimi i Kodit të Procedurës Penale, mbrojtja politike që i bëtë Ballukut dhe Reforma në Drejtësi”, u shpreh Tabaku.

Në fund, ajo theksoi se opozita mund të japë vetëm vullnet politik, por përgjegjësia kryesore për integrimin mbetet te qeveria.

“Opozita mund të shprehë vetëm vullnet politik, por rolin e qeverisë nuk e bëjmë dot”, përfundoi deputetja demokrate.