Deputeti i Partia Demokratike, Flamur Noka, ka sulmuar ashpër qeverinë gjatë seancës parlamentare, duke kërkuar llogari për mungesën e kryeministrit Edi Rama në një ditë që opozita e cilësoi të rëndësishme për procesin e integrimit europian.

“Ore ku e keni pasaportën europiane? Ore ku është kryeministri, që nuk vjen në një ditë kaq të rëndësishme”, deklaroi Noka nga foltorja e Kuvendit.

Ai kritikoi mungesën e Ramës dhe të kryenegociatorit për integrimin, duke akuzuar mazhorancën për mungesë transparence dhe përgjegjshmërie ndaj proceseve që lidhen me Bashkimi Europian.

“Nuk vjen kryenegociatori që të raportojë. Ndaj ju lutem që të përpiqeni sadopak. Edhe ky parlament është goditur nga ai raport”, u shpreh deputeti demokrat.

Më tej, Noka i bëri thirrje mazhorancës dhe drejtuesve të Kuvendit që të distancohen nga ajo që ai e quajti “batak politik”.

“Ju përpiquni të dilni nga ai raport. Përpiquni dhe ju zoti kryetar, që të dilni nga ai batak”, deklaroi ai.