Arena Wiener Stadthalle është mbushur me spektakël dhe emocione për hapjen e edicionit të 70-të të Eurovision Song Contest, një prej ngjarjeve më të mëdha muzikore në Evropë.

Nën moton “Të Bashkuar nga Muzika”, këtë vit në garë marrin pjesë 35 shtete, ndërsa Austria rikthehet si vend mikpritës pas 11 vitesh.

Alis përfaqëson Shqipërinë me këngën “Nan”, një performancë që sjell një mesazh emocional për figurën e nënës dhe lidhjen familjare. Kënga është vlerësuar për thjeshtësinë e saj dhe për linjën e fortë emocionale, duke tërhequr vëmendje edhe në disa media ndërkombëtare.

Për Shqipërinë, kualifikimi në finalen e madhe të së shtunës mbetet objektivi kryesor, ndërsa votimi i publikut dhe diasporës pritet të luajë rol vendimtar në rezultat.

Eurovisioni vazhdon të mbetet një nga spektaklet më të ndjekura muzikore në botë, duke bashkuar artistë dhe publike nga e gjithë Evropa në një skenë të vetme.